Mahāpadesasutta

Ekaṁ samayaṁ bhagavā bhoganagare viharati ānandacetiye.

Tatra kho bhagavā bhikkhū āmantesi:

“bhikkhavo”ti.

“Bhadante”ti te bhikkhū bhagavato paccassosuṁ.

Bhagavā etadavoca:

“cattārome, bhikkhave, mahāpadese desessāmi,

taṁ suṇātha, sādhukaṁ manasi karotha, bhāsissāmī”ti.

“Evaṁ, bhante”ti kho te bhikkhū bhagavato paccassosuṁ.

Bhagavā etadavoca:

“Katame, bhikkhave, cattāro mahāpadesā?

Idha, bhikkhave, bhikkhu evaṁ vadeyya:

‘sammukhā metaṁ, āvuso, bhagavato sutaṁ sammukhā paṭiggahitaṁ—

ayaṁ dhammo, ayaṁ vinayo, idaṁ satthusāsanan’ti.

Tassa, bhikkhave, bhikkhuno bhāsitaṁ neva abhinanditabbaṁ nappaṭikkositabbaṁ.

Anabhinanditvā appaṭikkositvā tāni padabyañjanāni sādhukaṁ uggahetvā sutte otāretabbāni, vinaye sandassetabbāni.

Tāni ce sutte otāriyamānāni vinaye sandassiyamānāni na ceva sutte otaranti na vinaye sandissanti, niṭṭhamettha gantabbaṁ:

‘addhā idaṁ na ceva tassa bhagavato vacanaṁ arahato sammāsambuddhassa;

imassa ca bhikkhuno duggahitan’ti.

Iti hetaṁ, bhikkhave, chaḍḍeyyātha.

Idha pana, bhikkhave, bhikkhu evaṁ vadeyya:

‘sammukhā metaṁ, āvuso, bhagavato sutaṁ sammukhā paṭiggahitaṁ—

ayaṁ dhammo, ayaṁ vinayo, idaṁ satthusāsanan’ti.

Tassa, bhikkhave, bhikkhuno bhāsitaṁ neva abhinanditabbaṁ nappaṭikkositabbaṁ.

Anabhinanditvā appaṭikkositvā tāni padabyañjanāni sādhukaṁ uggahetvā sutte otāretabbāni, vinaye sandassetabbāni.

Tāni ce sutte otāriyamānāni vinaye sandassiyamānāni sutte ceva otaranti vinaye ca sandissanti, niṭṭhamettha gantabbaṁ:

‘addhā idaṁ tassa bhagavato vacanaṁ arahato sammāsambuddhassa;

imassa ca bhikkhuno suggahitan’ti.

Idaṁ, bhikkhave, paṭhamaṁ mahāpadesaṁ dhāreyyātha.

Idha pana, bhikkhave, bhikkhu evaṁ vadeyya:

‘asukasmiṁ nāma āvāse saṅgho viharati sathero sapāmokkho.

Tassa me saṅghassa sammukhā sutaṁ sammukhā paṭiggahitaṁ—

ayaṁ dhammo, ayaṁ vinayo, idaṁ satthusāsanan’ti.

Tassa, bhikkhave, bhikkhuno bhāsitaṁ neva abhinanditabbaṁ nappaṭikkositabbaṁ.

Anabhinanditvā appaṭikkositvā tāni padabyañjanāni sādhukaṁ uggahetvā sutte otāretabbāni, vinaye sandassetabbāni.

Tāni ce sutte otāriyamānāni vinaye sandassiyamānāni na ceva sutte otaranti na vinaye sandissanti, niṭṭhamettha gantabbaṁ:

‘addhā idaṁ na ceva tassa bhagavato vacanaṁ arahato sammāsambuddhassa;

tassa ca saṅghassa duggahitan’ti.

Iti hetaṁ, bhikkhave, chaḍḍeyyātha.

Idha pana, bhikkhave, bhikkhu evaṁ vadeyya:

‘asukasmiṁ nāma āvāse saṅgho viharati sathero sapāmokkho.

Tassa me saṅghassa sammukhā sutaṁ sammukhā paṭiggahitaṁ—

ayaṁ dhammo, ayaṁ vinayo, idaṁ satthusāsanan’ti.

Tassa, bhikkhave, bhikkhuno bhāsitaṁ neva abhinanditabbaṁ nappaṭikkositabbaṁ.

Anabhinanditvā appaṭikkositvā tāni padabyañjanāni sādhukaṁ uggahetvā sutte otāretabbāni, vinaye sandassetabbāni.

Tāni ce sutte otāriyamānāni, vinaye sandassiyamānāni sutte ceva otaranti vinaye ca sandissanti, niṭṭhamettha gantabbaṁ:

‘addhā idaṁ tassa bhagavato vacanaṁ arahato sammāsambuddhassa;

tassa ca saṅghassa suggahitan’ti.

Idaṁ, bhikkhave, dutiyaṁ mahāpadesaṁ dhāreyyātha.

Idha pana, bhikkhave, bhikkhu evaṁ vadeyya:

‘asukasmiṁ nāma āvāse sambahulā therā bhikkhū viharanti bahussutā āgatāgamā dhammadharā vinayadharā mātikādharā.

Tesaṁ me therānaṁ sammukhā sutaṁ sammukhā paṭiggahitaṁ—

ayaṁ dhammo, ayaṁ vinayo, idaṁ satthusāsanan’ti.

Tassa, bhikkhave, bhikkhuno bhāsitaṁ neva abhinanditabbaṁ nappaṭikkositabbaṁ.

Anabhinanditvā appaṭikkositvā tāni padabyañjanāni sādhukaṁ uggahetvā sutte otāretabbāni, vinaye sandassetabbāni.

Tāni ce sutte otāriyamānāni vinaye sandassiyamānāni na ceva sutte otaranti na vinaye sandissanti, niṭṭhamettha gantabbaṁ:

‘addhā idaṁ na ceva tassa bhagavato vacanaṁ arahato sammāsambuddhassa;

tesañca therānaṁ duggahitan’ti.

Iti hetaṁ, bhikkhave, chaḍḍeyyātha.

Idha pana, bhikkhave, bhikkhu evaṁ vadeyya:

‘asukasmiṁ nāma āvāse sambahulā therā bhikkhū viharanti bahussutā āgatāgamā dhammadharā vinayadharā mātikādharā.

Tesaṁ me therānaṁ sammukhā sutaṁ sammukhā paṭiggahitaṁ—

ayaṁ dhammo, ayaṁ vinayo, idaṁ satthusāsanan’ti.

Tassa, bhikkhave, bhikkhuno bhāsitaṁ neva abhinanditabbaṁ nappaṭikkositabbaṁ.

Anabhinanditvā appaṭikkositvā tāni padabyañjanāni sādhukaṁ uggahetvā sutte otāretabbāni, vinaye sandassetabbāni.

Tāni ce sutte otāriyamānāni vinaye sandassiyamānāni sutte ceva otaranti vinaye ca sandissanti, niṭṭhamettha gantabbaṁ:

‘addhā idaṁ tassa bhagavato vacanaṁ arahato sammāsambuddhassa;

tesañca therānaṁ suggahitan’ti.

Idaṁ, bhikkhave, tatiyaṁ mahāpadesaṁ dhāreyyātha.

Idha pana, bhikkhave, bhikkhu evaṁ vadeyya:

‘asukasmiṁ nāma āvāse eko thero bhikkhu viharati bahussuto āgatāgamo dhammadharo vinayadharo mātikādharo.

Tassa me therassa sammukhā sutaṁ sammukhā paṭiggahitaṁ—

ayaṁ dhammo, ayaṁ vinayo, idaṁ satthusāsanan’ti.

Tassa, bhikkhave, bhikkhuno bhāsitaṁ neva abhinanditabbaṁ nappaṭikkositabbaṁ.

Anabhinanditvā appaṭikkositvā tāni padabyañjanāni sādhukaṁ uggahetvā sutte otāretabbāni, vinaye sandassetabbāni.

Tāni ce sutte otāriyamānāni vinaye sandassiyamānāni na ceva sutte otaranti na vinaye sandissanti, niṭṭhamettha gantabbaṁ:

‘addhā idaṁ na ceva tassa bhagavato vacanaṁ arahato sammāsambuddhassa;

tassa ca therassa duggahitan’ti.

Iti hetaṁ, bhikkhave, chaḍḍeyyātha.

Idha pana, bhikkhave, bhikkhu evaṁ vadeyya:

‘asukasmiṁ nāma āvāse eko thero bhikkhu viharati bahussuto āgatāgamo dhammadharo vinayadharo mātikādharo.

Tassa me therassa sammukhā sutaṁ sammukhā paṭiggahitaṁ—

ayaṁ dhammo, ayaṁ vinayo, idaṁ satthusāsanan’ti.

Tassa, bhikkhave, bhikkhuno bhāsitaṁ neva abhinanditabbaṁ nappaṭikkositabbaṁ.

Anabhinanditvā appaṭikkositvā tāni padabyañjanāni sādhukaṁ uggahetvā sutte otāretabbāni, vinaye sandassetabbāni.

Tāni ce sutte otāriyamānāni vinaye sandassiyamānāni sutte ceva otaranti vinaye ca sandissanti, niṭṭhamettha gantabbaṁ:

‘addhā idaṁ tassa bhagavato vacanaṁ arahato sammāsambuddhassa;

tassa ca therassa suggahitan’ti.

Idaṁ, bhikkhave, catutthaṁ mahāpadesaṁ dhāreyyātha.

Ime kho, bhikkhave, cattāro mahāpadesā”ti.

Dasamaṁ.

Sañcetaniyavaggo tatiyo.

Tassuddānaṁ

Cetanā vibhatti koṭṭhiko,

Ānando upavāṇapañcamaṁ;

Āyācana rāhula jambālī,

Nibbānaṁ mahāpadesenāti.