Choose translation / language

Sārajjasutta

Translator: Mahāsaṅgīti Tipiṭaka Buddhavasse 2500

“Pañcime, bhikkhave, sekhavesārajjakaraṇā dhammā.

Katame pañca?

Idha, bhikkhave, bhikkhu saddho hoti, sīlavā hoti, bahussuto hoti, āraddhavīriyo hoti, paññavā hoti.

Yaṁ, bhikkhave, assaddhassa sārajjaṁ hoti, saddhassa taṁ sārajjaṁ na hoti.

Tasmāyaṁ dhammo sekhavesārajjakaraṇo.

Yaṁ, bhikkhave, dussīlassa sārajjaṁ hoti, sīlavato taṁ sārajjaṁ na hoti.

Tasmāyaṁ dhammo sekhavesārajjakaraṇo.

Yaṁ, bhikkhave, appassutassa sārajjaṁ hoti, bahussutassa taṁ sārajjaṁ na hoti.

Tasmāyaṁ dhammo sekhavesārajjakaraṇo.

Yaṁ, bhikkhave, kusītassa sārajjaṁ hoti, āraddhavīriyassa taṁ sārajjaṁ na hoti.

Tasmāyaṁ dhammo sekhavesārajjakaraṇo.

Yaṁ, bhikkhave, duppaññassa sārajjaṁ hoti, paññavato taṁ sārajjaṁ na hoti.

Tasmāyaṁ dhammo sekhavesārajjakaraṇo.

Ime kho, bhikkhave, pañca sekhavesārajjakaraṇā dhammā”ti.

Paṭhamaṁ.

All materials on the site are available to everyone and are not protected by copyright. For non-commercial purposes, they may be freely reproduced in any form without the authors’ permission.

You may copy them, post them on websites and social media, quote them, or print them. This is a gift from our foundation to all of humanity.

For any questions, write to Nara Loka: https://naraloka.ru/en

Personal data processing policy and user agreement