Paṭhamaapāsādikasutta

“Pañcime, bhikkhave, ādīnavā apāsādike.

Katame pañca?

Attāpi attānaṁ upavadati,

anuvicca viññū garahanti,

pāpako kittisaddo abbhuggacchati,

sammūḷho kālaṁ karoti,

kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.

Ime kho, bhikkhave, pañca ādīnavā apāsādike.

Pañcime, bhikkhave, ānisaṁsā pāsādike.

Katame pañca?

Attāpi attānaṁ na upavadati,

anuvicca viññū pasaṁsanti,

kalyāṇo kittisaddo abbhuggacchati,

asammūḷho kālaṁ karoti,

kāyassa bhedā paraṁ maraṇā sugatiṁ saggaṁ lokaṁ upapajjati.

Ime kho, bhikkhave, pañca ānisaṁsā pāsādike”ti.

Sattamaṁ.