Paṭhamaduccaritasutta
“Pañcime, bhikkhave, ādīnavā duccarite.
Katame pañca?
Attāpi attānaṁ upavadati;
anuvicca viññū garahanti;
pāpako kittisaddo abbhuggacchati;
sammūḷho kālaṁ karoti;
kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.
Ime kho, bhikkhave, pañca ādīnavā duccarite.
Pañcime, bhikkhave, ānisaṁsā sucarite.
Katame pañca?
Attāpi attānaṁ na upavadati;
anuvicca viññū pasaṁsanti;
kalyāṇo kittisaddo abbhuggacchati;
asammūḷho kālaṁ karoti;
kāyassa bhedā paraṁ maraṇā sugatiṁ saggaṁ lokaṁ upapajjati.
Ime kho, bhikkhave, pañca ānisaṁsā sucarite”ti.
Paṭhamaṁ.
