Dutiyaduccaritasutta
“Pañcime, bhikkhave, ādīnavā duccarite.
Katame pañca?
Attāpi attānaṁ upavadati;
anuvicca viññū garahanti;
pāpako kittisaddo abbhuggacchati;
saddhammā vuṭṭhāti;
asaddhamme patiṭṭhāti.
Ime kho, bhikkhave, pañca ādīnavā duccarite.
Pañcime, bhikkhave, ānisaṁsā sucarite.
Katame pañca?
Attāpi attānaṁ na upavadati;
anuvicca viññū pasaṁsanti;
kalyāṇo kittisaddo abbhuggacchati;
asaddhammā vuṭṭhāti;
saddhamme patiṭṭhāti.
Ime kho, bhikkhave, pañca ānisaṁsā sucarite”ti.
Pañcamaṁ.
