Dutiyaparihānisutta

“Sattime, bhikkhave, dhammā upāsakassa parihānāya saṁvattanti.

Katame satta?

Bhikkhudassanaṁ hāpeti,

saddhammassavanaṁ pamajjati,

adhisīle na sikkhati,

appasādabahulo hoti,

bhikkhūsu theresu ceva navesu ca majjhimesu ca upārambhacitto dhammaṁ suṇāti randhagavesī,

ito bahiddhā dakkhiṇeyyaṁ gavesati,

tattha ca pubbakāraṁ karoti.

Ime kho, bhikkhave, satta dhammā upāsakassa parihānāya saṁvattanti.

Sattime, bhikkhave, dhammā upāsakassa aparihānāya saṁvattanti.

Katame satta?

Bhikkhudassanaṁ na hāpeti,

saddhammassavanaṁ nappamajjati,

adhisīle sikkhati,

pasādabahulo hoti,

bhikkhūsu theresu ceva navesu ca majjhimesu ca anupārambhacitto dhammaṁ suṇāti na randhagavesī,

na ito bahiddhā dakkhiṇeyyaṁ gavesati,

idha ca pubbakāraṁ karoti.

Ime kho, bhikkhave, satta dhammā upāsakassa aparihānāya saṁvattantī”ti.

Idamavoca bhagavā.

Idaṁ vatvāna sugato athāparaṁ etadavoca satthā:

“Dassanaṁ bhāvitattānaṁ,

Yo hāpeti upāsako;

Savanañca ariyadhammānaṁ,

Adhisīle na sikkhati.

Appasādo ca bhikkhūsu,

bhiyyo bhiyyo pavaḍḍhati;

Upārambhakacitto ca,

saddhammaṁ sotumicchati.

Ito ca bahiddhā aññaṁ,

dakkhiṇeyyaṁ gavesati;

Tattheva ca pubbakāraṁ,

yo karoti upāsako.

Ete kho parihāniye,

satta dhamme sudesite;

Upāsako sevamāno,

saddhammā parihāyati.

Dassanaṁ bhāvitattānaṁ,

Yo na hāpeti upāsako;

Savanañca ariyadhammānaṁ,

Adhisīle ca sikkhati.

Pasādo cassa bhikkhūsu,

bhiyyo bhiyyo pavaḍḍhati;

Anupārambhacitto ca,

saddhammaṁ sotumicchati.

Na ito bahiddhā aññaṁ,

dakkhiṇeyyaṁ gavesati;

Idheva ca pubbakāraṁ,

yo karoti upāsako.

Ete kho aparihāniye,

Satta dhamme sudesite;

Upāsako sevamāno,

Saddhammā na parihāyatī”ti.

Navamaṁ.