Assājānīyasutta

“Aṭṭhahi, bhikkhave, aṅgehi samannāgato rañño bhaddo assājānīyo rājāraho hoti rājabhoggo, rañño aṅganteva saṅkhaṁ gacchati.

Katamehi aṭṭhahi?

Idha, bhikkhave, rañño bhaddo assājānīyo ubhato sujāto hoti—

mātito ca pitito ca.

Yassaṁ disāyaṁ aññepi bhaddā assājānīyā jāyanti, tassaṁ disāyaṁ jāto hoti.

Yaṁ kho panassa bhojanaṁ denti—

allaṁ vā sukkhaṁ vā—

taṁ sakkaccaṁyeva paribhuñjati avikiranto.

Jegucchī hoti uccāraṁ vā passāvaṁ vā abhinisīdituṁ vā abhinipajjituṁ vā.

Sorato hoti sukhasaṁvāso, na ca aññe asse ubbejetā.

Yāni kho panassa honti sāṭheyyāni kūṭeyyāni jimheyyāni vaṅkeyyāni, tāni yathābhūtaṁ sārathissa āvikattā hoti.

Tesamassa sārathi abhinimmadanāya vāyamati.

Vāhī kho pana hoti.

‘Kāmaññe assā vahantu vā mā vā, ahamettha vahissāmī’ti cittaṁ uppādeti.

Gacchanto kho pana ujumaggeneva gacchati.

Thāmavā hoti yāva jīvitamaraṇapariyādānā thāmaṁ upadaṁsetā.

Imehi kho, bhikkhave, aṭṭhahi aṅgehi samannāgato rañño bhaddo assājānīyo rājāraho hoti rājabhoggo, rañño aṅganteva saṅkhaṁ gacchati.

Evamevaṁ kho, bhikkhave, aṭṭhahi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassa.

Katamehi aṭṭhahi?

Idha, bhikkhave, bhikkhu sīlavā hoti, pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu.

Yaṁ kho panassa bhojanaṁ denti—

lūkhaṁ vā paṇītaṁ vā—

taṁ sakkaccaṁyeva paribhuñjati avihaññamāno.

Jegucchī hoti kāyaduccaritena vacīduccaritena manoduccaritena;

jegucchī hoti anekavihitānaṁ pāpakānaṁ akusalānaṁ dhammānaṁ samāpattiyā.

Sorato hoti sukhasaṁvāso, na aññe bhikkhū ubbejetā.

Yāni kho panassa honti sāṭheyyāni kūṭeyyāni jimheyyāni vaṅkeyyāni, tāni yathābhūtaṁ āvikattā hoti satthari vā viññūsu vā sabrahmacārīsu.

Tesamassa satthā vā viññū vā sabrahmacārī abhinimmadanāya vāyamati.

Sikkhitā kho pana hoti.

‘Kāmaññe bhikkhū sikkhantu vā mā vā, ahamettha sikkhissāmī’ti cittaṁ uppādeti.

Gacchanto kho pana ujumaggeneva gacchati;

tatrāyaṁ ujumaggo, seyyathidaṁ—

sammādiṭṭhi …pe… sammāsamādhi.

Āraddhavīriyo viharati:

‘kāmaṁ taco ca nhāru ca aṭṭhi ca avasissatu, sarīre upassussatu maṁsalohitaṁ; yaṁ taṁ purisathāmena purisavīriyena purisaparakkamena pattabbaṁ, na taṁ apāpuṇitvā vīriyassa saṇṭhānaṁ bhavissatī’ti.

Imehi kho, bhikkhave, aṭṭhahi dhammehi samannāgato bhikkhu āhuneyyo hoti …pe… anuttaraṁ puññakkhettaṁ lokassā”ti.

Tatiyaṁ.