10. Saññālakkhaṇapañha
Translator: Mahāsaṅgīti Tipiṭaka Buddhavasse 2500
kn
mil
Milindapañha
Vicāravagga
10. Saññālakkhaṇapañha
“Bhante nāgasena, kiṁlakkhaṇā saññā”ti?
“Sañjānanalakkhaṇā, mahārāja, saññā.
Kiṁ sañjānāti?
Nīlampi sañjānāti, pītampi sañjānāti, lohitampi sañjānāti, odātampi sañjānāti, mañjiṭṭhampi sañjānāti.
Evaṁ kho, mahārāja, sañjānanalakkhaṇā saññā”ti.
“Opammaṁ karohī”ti.
“Yathā, mahārāja, rañño bhaṇḍāgāriko bhaṇḍāgāraṁ pavisitvā nīlapītalohitodātamañjiṭṭhāni rājabhogāni rūpāni passitvā sañjānāti.
Evaṁ kho, mahārāja, sañjānanalakkhaṇā saññā”ti.
“Kallosi, bhante nāgasenā”ti.
Saññālakkhaṇapañho dasamo.
