Sammāparibbājanīyasutta
“Pucchāmi muniṁ pahūtapaññaṁ,
Tiṇṇaṁ pāraṅgataṁ parinibbutaṁ ṭhitattaṁ;
Nikkhamma gharā panujja kāme,
Kathaṁ bhikkhu sammā so loke paribbajeyya”.
“Yassa maṅgalā samūhatā,
(iti bhagavā)
Uppātā supinā ca lakkhaṇā ca;
So maṅgaladosavippahīno,
Sammā so loke paribbajeyya.
Rāgaṁ vinayetha mānusesu,
Dibbesu kāmesu cāpi bhikkhu;
Atikkamma bhavaṁ samecca dhammaṁ,
Sammā so loke paribbajeyya.
Vipiṭṭhikatvāna pesuṇāni,
Kodhaṁ kadarīyaṁ jaheyya bhikkhu;
Anurodhavirodhavippahīno,
Sammā so loke paribbajeyya.
Hitvāna piyañca appiyañca,
Anupādāya anissito kuhiñci;
Saṁyojaniyehi vippamutto,
Sammā so loke paribbajeyya.
Na so upadhīsu sārameti,
Ādānesu vineyya chandarāgaṁ;
So anissito anaññaneyyo,
Sammā so loke paribbajeyya.
Vacasā manasā ca kammunā ca,
Aviruddho sammā viditvā dhammaṁ;
Nibbānapadābhipatthayāno,
Sammā so loke paribbajeyya.
Yo vandati manti nunnameyya,
Akkuṭṭhopi na sandhiyetha bhikkhu;
Laddhā parabhojanaṁ na majje,
Sammā so loke paribbajeyya.
Lobhañca bhavañca vippahāya,
Virato chedanabandhanā ca bhikkhu;
So tiṇṇakathaṅkatho visallo,
Sammā so loke paribbajeyya.
Sāruppaṁ attano viditvā,
No ca bhikkhu hiṁseyya kañci loke;
Yathātathiyaṁ viditvā dhammaṁ,
Sammā so loke paribbajeyya.
Yassānusayā na santi keci,
Mūlā ca akusalā samūhatāse;
So nirāso anāsisāno,
Sammā so loke paribbajeyya.
Āsavakhīṇo pahīnamāno,
Sabbaṁ rāgapathaṁ upātivatto;
Danto parinibbuto ṭhitatto,
Sammā so loke paribbajeyya.
Saddho sutavā niyāmadassī,
Vaggagatesu na vaggasāri dhīro;
Lobhaṁ dosaṁ vineyya paṭighaṁ,
Sammā so loke paribbajeyya.
Saṁsuddhajino vivaṭṭacchado,
Dhammesu vasī pāragū anejo;
Saṅkhāranirodhañāṇakusalo,
Sammā so loke paribbajeyya.
Atītesu anāgatesu cāpi,
Kappātīto aticcasuddhipañño;
Sabbāyatanehi vippamutto,
Sammā so loke paribbajeyya.
Aññāya padaṁ samecca dhammaṁ,
Vivaṭaṁ disvāna pahānamāsavānaṁ;
Sabbupadhīnaṁ parikkhayāno,
Sammā so loke paribbajeyya”.
“Addhā hi bhagavā tatheva etaṁ,
Yo so evaṁvihārī danto bhikkhu;
Sabbasaṁyojanayogavītivatto,
Sammā so loke paribbajeyyā”ti.
Sammāparibbājanīyasuttaṁ terasamaṁ.
