Sammukhāthavikattheraapadāna
“Jāyamāne vipassimhi,
nimittaṁ byākariṁ ahaṁ;
‘Nibbāpayiñca janataṁ,
buddho loke bhavissati.
Yasmiñca jāyamānasmiṁ,
dasasahassi kampati;
So dāni bhagavā satthā,
dhammaṁ deseti cakkhumā.
Yasmiñca jāyamānasmiṁ,
āloko vipulo ahu;
So dāni bhagavā satthā,
dhammaṁ deseti cakkhumā.
Yasmiñca jāyamānasmiṁ,
saritāyo na sandayuṁ;
So dāni bhagavā satthā,
dhammaṁ deseti cakkhumā.
Yasmiñca jāyamānasmiṁ,
avīcaggi na pajjali;
So dāni bhagavā satthā,
dhammaṁ deseti cakkhumā.
Yasmiñca jāyamānasmiṁ,
pakkhisaṅgho na sañcari;
So dāni bhagavā satthā,
dhammaṁ deseti cakkhumā.
Yasmiñca jāyamānasmiṁ,
vātakkhandho na vāyati;
So dāni bhagavā satthā,
dhammaṁ deseti cakkhumā.
Yasmiñca jāyamānasmiṁ,
sabbaratanāni jotayuṁ;
So dāni bhagavā satthā,
dhammaṁ deseti cakkhumā.
Yasmiñca jāyamānasmiṁ,
sattāsuṁ padavikkamā;
So dāni bhagavā satthā,
dhammaṁ deseti cakkhumā.
Jātamatto ca sambuddho,
disā sabbā vilokayi;
Vācāsabhimudīresi,
esā buddhāna dhammatā’.
Saṁvejayitvā janataṁ,
thavitvā lokanāyakaṁ;
Sambuddhaṁ abhivādetvā,
pakkāmiṁ pācināmukho.
Ekanavutito kappe,
yaṁ buddhamabhithomayiṁ;
Duggatiṁ nābhijānāmi,
thomanāya idaṁ phalaṁ.
Ito navutikappamhi,
sammukhāthavikavhayo;
Sattaratanasampanno,
cakkavattī mahabbalo.
Pathavīdundubhi nāma,
ekūnanavutimhito;
Sattaratanasampanno,
cakkavattī mahabbalo.
Aṭṭhāsītimhito kappe,
obhāso nāma khattiyo;
Sattaratanasampanno,
cakkavattī mahabbalo.
Sattāsītimhito kappe,
saritacchedanavhayo;
Sattaratanasampanno,
cakkavattī mahabbalo.
Agginibbāpano nāma,
kappānaṁ chaḷasītiyā;
Sattaratanasampanno,
cakkavattī mahabbalo.
Gatipacchedano nāma,
kappānaṁ pañcasītiyā;
Sattaratanasampanno,
cakkavattī mahabbalo.
Rājā vātasamo nāma,
kappānaṁ cullasītiyā;
Sattaratanasampanno,
cakkavattī mahabbalo.
Ratanapajjalo nāma,
kappānaṁ teasītiyā;
Sattaratanasampanno,
cakkavattī mahabbalo.
Padavikkamano nāma,
kappānaṁ dveasītiyā;
Sattaratanasampanno,
cakkavattī mahabbalo.
Rājā vilokano nāma,
kappānaṁ ekasītiyā;
Sattaratanasampanno,
cakkavattī mahabbalo.
Girasāroti nāmena,
kappesītimhi khattiyo;
Sattaratanasampanno,
cakkavattī mahabbalo.
Paṭisambhidā catasso,
…pe…
kataṁ buddhassa sāsanaṁ”.
Itthaṁ sudaṁ āyasmā sammukhāthaviko thero imā gāthāyo abhāsitthāti.
Sammukhāthavikattherassāpadānaṁ pañcamaṁ.
