Punabbasusutta

Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena bhagavā bhikkhū nibbānapaṭisaṁyuttāya dhammiyā kathāya sandasseti samādapeti samuttejeti sampahaṁseti.

Te ca bhikkhū aṭṭhiṁ katvā manasi katvā sabbacetasā samannāharitvā ohitasotā dhammaṁ suṇanti.

Atha kho punabbasumātā yakkhinī puttake evaṁ tosesi:

“Tuṇhī uttarike hohi,

tuṇhī hohi punabbasu;

Yāvāhaṁ buddhaseṭṭhassa,

dhammaṁ sossāmi satthuno.

Nibbānaṁ bhagavā āha,

sabbaganthappamocanaṁ;

Ativelā ca me hoti,

asmiṁ dhamme piyāyanā.

Piyo loke sako putto,

piyo loke sako pati;

Tato piyatarā mayhaṁ,

assa dhammassa magganā.

Na hi putto pati vāpi,

piyo dukkhā pamocaye;

Yathā saddhammassavanaṁ,

dukkhā moceti pāṇinaṁ.

Loke dukkhaparetasmiṁ,

Jarāmaraṇasaṁyute;

Jarāmaraṇamokkhāya,

Yaṁ dhammaṁ abhisambudhaṁ;

Taṁ dhammaṁ sotumicchāmi,

Tuṇhī hohi punabbasū”ti.

“Ammā na byāharissāmi,

tuṇhībhūtāyamuttarā;

Dhammameva nisāmehi,

saddhammassavanaṁ sukhaṁ;

Saddhammassa anaññāya,

ammā dukkhaṁ carāmase.

Esa devamanussānaṁ,

sammūḷhānaṁ pabhaṅkaro;

Buddho antimasārīro,

dhammaṁ deseti cakkhumā”ti.

“Sādhu kho paṇḍito nāma,

putto jāto uresayo;

Putto me buddhaseṭṭhassa,

dhammaṁ suddhaṁ piyāyati.

Punabbasu sukhī hohi,

ajjāhamhi samuggatā;

Diṭṭhāni ariyasaccāni,

uttarāpi suṇātu me”ti.