Rāmaṇeyyakasutta

Sāvatthiyaṁ jetavane.

Atha kho sakko devānamindo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhito kho sakko devānamindo bhagavantaṁ etadavoca:

“kiṁ nu kho, bhante, bhūmirāmaṇeyyakan”ti?

“Ārāmacetyā vanacetyā,

pokkharañño sunimmitā;

Manussarāmaṇeyyassa,

kalaṁ nāgghanti soḷasiṁ.

Gāme vā yadi vāraññe,

Ninne vā yadi vā thale;

Yattha arahanto viharanti,

Taṁ bhūmirāmaṇeyyakan”ti.