Duggatasutta

Ekaṁ samayaṁ bhagavā sāvatthiyaṁ viharati.

Tatra kho …pe…

“Anamataggoyaṁ, bhikkhave, saṁsāro.

Pubbā koṭi na paññāyati avijjānīvaraṇānaṁ sattānaṁ taṇhāsaṁyojanānaṁ sandhāvataṁ saṁsarataṁ.

Yaṁ, bhikkhave, passeyyātha duggataṁ durūpetaṁ niṭṭhamettha gantabbaṁ:

‘amhehipi evarūpaṁ paccanubhūtaṁ iminā dīghena addhunā’ti.

Taṁ kissa hetu …pe…

yāvañcidaṁ, bhikkhave, alameva sabbasaṅkhāresu nibbindituṁ alaṁ virajjituṁ alaṁ vimuccitun”ti.

Paṭhamaṁ.