Mātusutta

Sāvatthiyaṁ viharati.

“Dāruṇo, bhikkhave, lābhasakkārasiloko kaṭuko pharuso antarāyiko anuttarassa yogakkhemassa adhigamāya.

Idhāhaṁ, bhikkhave, ekaccaṁ puggalaṁ evaṁ cetasā ceto paricca pajānāmi:

‘na cāyamāyasmā mātupi hetu sampajānamusā bhāseyyā’ti.

Tamenaṁ passāmi aparena samayena lābhasakkārasilokena abhibhūtaṁ pariyādiṇṇacittaṁ sampajānamusā bhāsantaṁ.

Evaṁ dāruṇo kho, bhikkhave, lābhasakkārasiloko kaṭuko pharuso antarāyiko anuttarassa yogakkhemassa adhigamāya.

Tasmātiha, bhikkhave, evaṁ sikkhitabbaṁ:

‘uppannaṁ lābhasakkārasilokaṁ pajahissāma.

Na ca no uppanno lābhasakkārasiloko cittaṁ pariyādāya ṭhassatī’ti.

Evañhi vo, bhikkhave, sikkhitabban”ti.

Sattamaṁ.