Dāmalisutta

Sāvatthinidānaṁ.

Atha kho dāmali devaputto abhikkantāya rattiyā abhikkantavaṇṇo kevalakappaṁ jetavanaṁ obhāsetvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi.

Ekamantaṁ ṭhito kho dāmali devaputto bhagavato santike imaṁ gāthaṁ abhāsi:

“Karaṇīyametaṁ brāhmaṇena,

Padhānaṁ akilāsunā;

Kāmānaṁ vippahānena,

Na tenāsīsate bhavan”ti.

“Natthi kiccaṁ brāhmaṇassa,

(dāmalīti bhagavā)

Katakicco hi brāhmaṇo;

Yāva na gādhaṁ labhati nadīsu,

Āyūhati sabbagattebhi jantu;

Gādhañca laddhāna thale ṭhito yo,

Nāyūhatī pāragato hi sova.

Esūpamā dāmali brāhmaṇassa,

Khīṇāsavassa nipakassa jhāyino;

Pappuyya jātimaraṇassa antaṁ,

Nāyūhatī pāragato hi so”ti.