Avijjāsutta

Sāvatthinidānaṁ.

Atha kho aññataro bhikkhu yena bhagavā tenupasaṅkami …pe…

ekamantaṁ nisinno kho so bhikkhu bhagavantaṁ etadavoca:

“‘avijjā, avijjā’ti, bhante, vuccati.

Katamā nu kho, bhante, avijjā;

kittāvatā ca avijjāgato hotī”ti?

“Idha, bhikkhu, assutavā puthujjano rūpaṁ nappajānāti, rūpasamudayaṁ nappajānāti, rūpanirodhaṁ nappajānāti, rūpanirodhagāminiṁ paṭipadaṁ nappajānāti;

vedanaṁ nappajānāti …

saññaṁ …

saṅkhāre nappajānāti …pe…

viññāṇanirodhagāminiṁ paṭipadaṁ nappajānāti.

Ayaṁ vuccati, bhikkhu, avijjā;

ettāvatā ca avijjāgato hotī”ti.

Paṭhamaṁ.