Ajjhattānattahetusutta

“Cakkhuṁ, bhikkhave, anattā.

Yopi hetu, yopi paccayo cakkhussa uppādāya, sopi anattā.

Anattasambhūtaṁ, bhikkhave, cakkhu kuto attā bhavissati …pe…

jivhā anattā.

Yopi hetu yopi paccayo jivhāya uppādāya, sopi anattā.

Anattasambhūtā, bhikkhave, jivhā kuto attā bhavissati …pe…

mano anattā.

Yopi hetu yopi paccayo manassa uppādāya, sopi anattā.

Anattasambhūto, bhikkhave, mano kuto attā bhavissati.

Evaṁ passaṁ …pe…

nāparaṁ itthattāyā’ti pajānātī”ti.

Navamaṁ.