Ajjhattaaniccanandikkhayasutta

“Cakkhuṁ, bhikkhave, yoniso manasi karotha, cakkhāniccatañca yathābhūtaṁ samanupassatha.

Cakkhuṁ, bhikkhave, bhikkhu yoniso manasikaronto, cakkhāniccatañca yathābhūtaṁ samanupassanto cakkhusmimpi nibbindati.

Nandikkhayā rāgakkhayo;

rāgakkhayā nandikkhayo.

Nandirāgakkhayā cittaṁ suvimuttanti vuccati.

Sotaṁ, bhikkhave, yoniso manasi karotha …

ghānaṁ …

jivhaṁ, bhikkhave, yoniso manasi karotha, jivhāniccatañca yathābhūtaṁ samanupassatha.

Jivhaṁ, bhikkhave, bhikkhu yoniso manasikaronto, jivhāniccatañca yathābhūtaṁ samanupassanto jivhāyapi nibbindati.

Nandikkhayā rāgakkhayo;

rāgakkhayā nandikkhayo.

Nandirāgakkhayā cittaṁ suvimuttanti vuccati.

Kāyaṁ …

manaṁ, bhikkhave, yoniso manasi karotha, manāniccatañca yathābhūtaṁ samanupassatha.

Manaṁ, bhikkhave, bhikkhu yoniso manasikaronto, manāniccatañca yathābhūtaṁ samanupassanto manasmimpi nibbindati.

Nandikkhayā rāgakkhayo;

rāgakkhayā nandikkhayo.

Nandirāgakkhayā cittaṁ suvimuttanti vuccatī”ti.

Tatiyaṁ.