Paṭhamavihārasutta

Sāvatthinidānaṁ.

“Icchāmahaṁ, bhikkhave, aḍḍhamāsaṁ paṭisallīyituṁ.

Namhi kenaci upasaṅkamitabbo, aññatra ekena piṇḍapātanīhārakenā”ti.

“Evaṁ, bhante”ti kho te bhikkhū bhagavato paṭissutvā nāssudha koci bhagavantaṁ upasaṅkamati, aññatra ekena piṇḍapātanīhārakena.

Atha kho bhagavā tassa aḍḍhamāsassa accayena paṭisallānā vuṭṭhito bhikkhū āmantesi:

“yena svāhaṁ, bhikkhave, vihārena paṭhamābhisambuddho viharāmi, tassa padesena vihāsiṁ.

So evaṁ pajānāmi:

‘micchādiṭṭhipaccayāpi vedayitaṁ;

sammādiṭṭhipaccayāpi vedayitaṁ …pe…

micchāsamādhipaccayāpi vedayitaṁ;

sammāsamādhipaccayāpi vedayitaṁ;

chandapaccayāpi vedayitaṁ;

vitakkapaccayāpi vedayitaṁ;

saññāpaccayāpi vedayitaṁ;

chando ca avūpasanto hoti, vitakko ca avūpasanto hoti, saññā ca avūpasantā hoti, tappaccayāpi vedayitaṁ;

chando ca vūpasanto hoti, vitakko ca vūpasanto hoti, saññā ca vūpasantā hoti, tappaccayāpi vedayitaṁ;

appattassa pattiyā atthi āyāmaṁ, tasmimpi ṭhāne anuppatte tappaccayāpi vedayitan’”ti.

Paṭhamaṁ.