Vibhaṅgasutta

“Satipaṭṭhānañca vo, bhikkhave, desessāmi satipaṭṭhānabhāvanañca satipaṭṭhānabhāvanāgāminiñca paṭipadaṁ.

Taṁ suṇātha.

Katamañca, bhikkhave, satipaṭṭhānaṁ?

Idha, bhikkhave, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṁ;

vedanāsu vedanānupassī viharati …pe…

citte cittānupassī viharati …pe…

dhammesu dhammānupassī viharati ātāpī sampajāno satimā, vineyya loke abhijjhādomanassaṁ.

Idaṁ vuccati, bhikkhave, satipaṭṭhānaṁ.

Katamā ca, bhikkhave, satipaṭṭhānabhāvanā?

Idha, bhikkhave, bhikkhu samudayadhammānupassī kāyasmiṁ viharati, vayadhammānupassī kāyasmiṁ viharati, samudayavayadhammānupassī kāyasmiṁ viharati, ātāpī sampajāno satimā, vineyya loke abhijjhādomanassaṁ.

Samudayadhammānupassī vedanāsu viharati …pe…

samudayadhammānupassī citte viharati …pe…

samudayadhammānupassī dhammesu viharati, vayadhammānupassī dhammesu viharati, samudayavayadhammānupassī dhammesu viharati, ātāpī sampajāno satimā, vineyya loke abhijjhādomanassaṁ.

Ayaṁ vuccati, bhikkhave, satipaṭṭhānabhāvanā.

Katamā ca, bhikkhave, satipaṭṭhānabhāvanāgāminī paṭipadā?

Ayameva ariyo aṭṭhaṅgiko maggo, seyyathidaṁ—

sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi.

Ayaṁ vuccati, bhikkhave, satipaṭṭhānabhāvanāgāminī paṭipadā”ti.

Dasamaṁ.

Ananussutavaggo catuttho.

Tassuddānaṁ

Ananussutaṁ virāgo,

viraddho bhāvanā sati;

Aññā chandaṁ pariññāya,

bhāvanā vibhaṅgena cāti.