Sālasutta

Evaṁ me sutaṁ—

ekaṁ samayaṁ bhagavā kosalesu viharati sālāya brāhmaṇagāme.

Tatra kho bhagavā bhikkhū āmantesi:

“seyyathāpi, bhikkhave, ye keci tiracchānagatā pāṇā, sīho migarājā tesaṁ aggamakkhāyati, yadidaṁ—thāmena javena sūrena;

evameva kho, bhikkhave, ye keci bodhipakkhiyā dhammā, paññindriyaṁ tesaṁ aggamakkhāyati, yadidaṁ—bodhāya.

Katame ca, bhikkhave, bodhipakkhiyā dhammā?

Saddhindriyaṁ, bhikkhave, bodhipakkhiyo dhammo, taṁ bodhāya saṁvattati;

vīriyindriyaṁ bodhipakkhiyo dhammo, taṁ bodhāya saṁvattati;

satindriyaṁ bodhipakkhiyo dhammo, taṁ bodhāya saṁvattati;

samādhindriyaṁ bodhipakkhiyo dhammo, taṁ bodhāya saṁvattati;

paññindriyaṁ bodhipakkhiyo dhammo, taṁ bodhāya saṁvattati.

Seyyathāpi, bhikkhave, ye keci tiracchānagatā pāṇā, sīho migarājā tesaṁ aggamakkhāyati, yadidaṁ—thāmena javena sūrena;

evameva kho, bhikkhave, ye keci bodhipakkhiyā dhammā, paññindriyaṁ tesaṁ aggamakkhāyati, yadidaṁ—bodhāyā”ti.

Paṭhamaṁ.