Ariṭṭhasutta

Sāvatthinidānaṁ.

Tatra kho bhagavā …pe… etadavoca:

“bhāvetha no tumhe bhikkhave, ānāpānassatin”ti?

Evaṁ vutte, āyasmā ariṭṭho bhagavantaṁ etadavoca:

“ahaṁ kho, bhante, bhāvemi ānāpānassatin”ti.

“Yathā kathaṁ pana tvaṁ, ariṭṭha, bhāvesi ānāpānassatin”ti?

“Atītesu me, bhante, kāmesu kāmacchando pahīno, anāgatesu me kāmesu kāmacchando vigato, ajjhattabahiddhā ca me dhammesu paṭighasaññā suppaṭivinītā.

So satova assasissāmi, satova passasissāmi.

Evaṁ khvāhaṁ, bhante, bhāvemi ānāpānassatin”ti.

“‘Atthesā, ariṭṭha, ānāpānassati, nesā natthī’ti vadāmi.

Api ca, ariṭṭha, yathā ānāpānassati vitthārena paripuṇṇā hoti

taṁ suṇāhi, sādhukaṁ manasi karohi; bhāsissāmī”ti.

“Evaṁ, bhante”ti kho āyasmā ariṭṭho bhagavato paccassosi.

Bhagavā etadavoca:

“Kathañca, ariṭṭha, ānāpānassati vitthārena paripuṇṇā hoti?

Idha, ariṭṭha, bhikkhu araññagato vā rukkhamūlagato vā suññāgāragato vā nisīdati pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā.

So satova assasati, satova passasati.

Dīghaṁ vā assasanto ‘dīghaṁ assasāmī’ti pajānāti …pe…

‘paṭinissaggānupassī assasissāmī’ti sikkhati, ‘paṭinissaggānupassī passasissāmī’ti sikkhati.

Evaṁ kho, ariṭṭha, ānāpānassati vitthārena paripuṇṇā hotī”ti.

Chaṭṭhaṁ.