Aveccappasannasutta

an / an10
Aṅguttara Nikāya 10.64 · 7. Yamakavagga
an / an10
Aṅguttara Nikāya 10.64 · 7. Yamakavagga

“Ye keci, bhikkhave, mayi aveccappasannā, sabbe te sotāpannā.

Tesaṁ sotāpannānaṁ pañcannaṁ idha niṭṭhā, pañcannaṁ idha vihāya niṭṭhā.

Katamesaṁ pañcannaṁ idha niṭṭhā?

Sattakkhattuparamassa, kolaṅkolassa, ekabījissa, sakadāgāmissa, yo ca diṭṭheva dhamme arahā—

imesaṁ pañcannaṁ idha niṭṭhā.

Katamesaṁ pañcannaṁ idha vihāya niṭṭhā?

Antarāparinibbāyissa, upahaccaparinibbāyissa, asaṅkhāraparinibbāyissa, sasaṅkhāraparinibbāyissa, uddhaṁsotassa akaniṭṭhagāmino—

imesaṁ pañcannaṁ idha vihāya niṭṭhā.

Ye keci, bhikkhave, mayi aveccappasannā sabbe te sotāpannā.

Tesaṁ sotāpannānaṁ imesaṁ pañcannaṁ idha niṭṭhā, imesaṁ pañcannaṁ idha vihāya niṭṭhā”ti.

Catutthaṁ.

Предыдущая сутта Следующая сутта