Dussīlasutta

“Catūhi, bhikkhave, dhammehi samannāgato yathābhataṁ nikkhitto evaṁ niraye.

Katamehi catūhi?

Assaddho hoti, dussīlo hoti, kusīto hoti, duppañño hoti—

imehi kho, bhikkhave, catūhi dhammehi samannāgato yathābhataṁ nikkhitto evaṁ niraye.

Catūhi, bhikkhave, dhammehi samannāgato yathābhataṁ nikkhitto evaṁ sagge.

Katamehi catūhi?

Saddho hoti, sīlavā hoti, āraddhavīriyo hoti, paññavā hoti—

imehi kho, bhikkhave, catūhi dhammehi samannāgato yathābhataṁ nikkhitto evaṁ sagge”ti.

Dasamaṁ.

Parisasobhaṇavaggo dutiyo.

Tassuddānaṁ

Parisā diṭṭhi akataññutā,

Pāṇātipātāpi dve maggā;

Dve vohārapathā vuttā,

Ahirikaṁ duppaññena cāti.