Lokasutta

“Loko, bhikkhave, tathāgatena abhisambuddho.

Lokasmā tathāgato visaṁyutto.

Lokasamudayo, bhikkhave, tathāgatena abhisambuddho.

Lokasamudayo tathāgatassa pahīno.

Lokanirodho, bhikkhave, tathāgatena abhisambuddho.

Lokanirodho tathāgatassa sacchikato.

Lokanirodhagāminī paṭipadā, bhikkhave, tathāgatena abhisambuddhā.

Lokanirodhagāminī paṭipadā tathāgatassa bhāvitā.

Yaṁ, bhikkhave, sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, sabbaṁ taṁ tathāgatena abhisambuddhaṁ.

Tasmā ‘tathāgato’ti vuccati.

Yañca, bhikkhave, rattiṁ tathāgato anuttaraṁ sammāsambodhiṁ abhisambujjhati yañca rattiṁ anupādisesāya nibbānadhātuyā parinibbāyati, yaṁ etasmiṁ antare bhāsati lapati niddisati sabbaṁ taṁ tatheva hoti, no aññathā.

Tasmā ‘tathāgato’ti vuccati.

Yathāvādī, bhikkhave, tathāgato tathākārī, yathākārī tathāvādī.

Iti yathāvādī tathākārī, yathākārī tathāvādī.

Tasmā ‘tathāgato’ti vuccati.

Sadevake, bhikkhave, loke samārake sabrahmake sassamaṇabrāhmaṇiyā pajāya sadevamanussāya tathāgato abhibhū anabhibhūto aññadatthu daso vasavattī.

Tasmā ‘tathāgato’ti vuccati.

Sabbaṁ lokaṁ abhiññāya,

sabbaṁ loke yathātathaṁ;

Sabbaṁ lokaṁ visaṁyutto,

sabbaloke anūpayo.

Sa ve sabbābhibhū dhīro,

sabbaganthappamocano;

Phuṭṭha’ssa paramā santi,

nibbānaṁ akutobhayaṁ.

Esa khīṇāsavo buddho,

anīgho chinnasaṁsayo;

Sabbakammakkhayaṁ patto,

vimutto upadhisaṅkhaye.

Esa so bhagavā buddho,

esa sīho anuttaro;

Sadevakassa lokassa,

brahmacakkaṁ pavattayī.

Iti devā manussā ca,

ye buddhaṁ saraṇaṁ gatā;

Saṅgamma taṁ namassanti,

mahantaṁ vītasāradaṁ.

Danto damayataṁ seṭṭho,

santo samayataṁ isi;

Mutto mocayataṁ aggo,

tiṇṇo tārayataṁ varo.

Iti hetaṁ namassanti,

mahantaṁ vītasāradaṁ;

Sadevakasmiṁ lokasmiṁ,

natthi me paṭipuggalo”ti.

Tatiyaṁ.