Cakkasutta

“Cattārimāni, bhikkhave, cakkāni, yehi samannāgatānaṁ devamanussānaṁ catucakkaṁ vattati, yehi samannāgatā devamanussā nacirasseva mahantattaṁ vepullattaṁ pāpuṇanti bhogesu.

Katamāni cattāri?

Patirūpadesavāso, sappurisāvassayo, attasammāpaṇidhi, pubbe ca katapuññatā—

Imāni kho, bhikkhave, cattāri cakkāni, yehi samannāgatānaṁ devamanussānaṁ catucakkaṁ vattati, yehi samannāgatā devamanussā nacirasseva mahantattaṁ vepullattaṁ pāpuṇanti bhogesūti.

Patirūpe vase dese,

ariyamittakaro siyā;

Sammāpaṇidhisampanno,

pubbe puññakato naro;

Dhaññaṁ dhanaṁ yaso kitti,

sukhañcetaṁdhivattatī”ti.

Paṭhamaṁ.