Dutiyaakkhantisutta

“Pañcime, bhikkhave, ādīnavā akkhantiyā.

Katame pañca?

Bahuno janassa appiyo hoti amanāpo, luddo ca hoti, vippaṭisārī ca, sammūḷho kālaṁ karoti, kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati.

Ime kho, bhikkhave, pañca ādīnavā akkhantiyā.

Pañcime, bhikkhave, ānisaṁsā khantiyā.

Katame pañca?

Bahuno janassa piyo hoti manāpo, aluddo ca hoti, avippaṭisārī ca, asammūḷho kālaṁ karoti, kāyassa bhedā paraṁ maraṇā sugatiṁ saggaṁ lokaṁ upapajjati.

Ime kho, bhikkhave, pañca ānisaṁsā khantiyā”ti.

Chaṭṭhaṁ.