Maccharīsutta

“Pañcime, bhikkhave, ādīnavā atinivāse.

Katame pañca?

Āvāsamaccharī hoti, kulamaccharī hoti, lābhamaccharī hoti, vaṇṇamaccharī hoti, dhammamaccharī hoti.

Ime kho, bhikkhave, pañca ādīnavā atinivāse.

Pañcime, bhikkhave, ānisaṁsā samavatthavāse.

Katame pañca?

Na āvāsamaccharī hoti, na kulamaccharī hoti, na lābhamaccharī hoti, na vaṇṇamaccharī hoti, na dhammamaccharī hoti.

Ime kho, bhikkhave, pañca ānisaṁsā samavatthavāse”ti.

Catutthaṁ.