Sivathikasutta

“Pañcime, bhikkhave, ādīnavā sivathikāya.

Katame pañca?

Asuci, duggandhā, sappaṭibhayā, vāḷānaṁ amanussānaṁ āvāso, bahuno janassa ārodanā—

ime kho, bhikkhave, pañca ādīnavā sivathikāya.

Evamevaṁ kho, bhikkhave, pañcime ādīnavā sivathikūpame puggale.

Katame pañca?

Idha, bhikkhave, ekacco puggalo asucinā kāyakammena samannāgato hoti;

asucinā vacīkammena samannāgato hoti;

asucinā manokammena samannāgato hoti.

Idamassa asucitāya vadāmi.

Seyyathāpi sā, bhikkhave, sivathikā asuci;

tathūpamāhaṁ, bhikkhave, imaṁ puggalaṁ vadāmi.

Tassa asucinā kāyakammena samannāgatassa, asucinā vacīkammena samannāgatassa, asucinā manokammena samannāgatassa pāpako kittisaddo abbhuggacchati.

Idamassa duggandhatāya vadāmi.

Seyyathāpi sā, bhikkhave, sivathikā duggandhā;

tathūpamāhaṁ, bhikkhave, imaṁ puggalaṁ vadāmi.

Tamenaṁ asucinā kāyakammena samannāgataṁ, asucinā vacīkammena samannāgataṁ, asucinā manokammena samannāgataṁ pesalā sabrahmacārī ārakā parivajjanti.

Idamassa sappaṭibhayasmiṁ vadāmi.

Seyyathāpi sā, bhikkhave, sivathikā sappaṭibhayā;

tathūpamāhaṁ, bhikkhave, imaṁ puggalaṁ vadāmi.

So asucinā kāyakammena samannāgato, asucinā vacīkammena samannāgato, asucinā manokammena samannāgato sabhāgehi puggalehi saddhiṁ saṁvasati.

Idamassa vāḷāvāsasmiṁ vadāmi.

Seyyathāpi sā, bhikkhave, sivathikā vāḷānaṁ amanussānaṁ āvāso;

tathūpamāhaṁ, bhikkhave, imaṁ puggalaṁ vadāmi.

Tamenaṁ asucinā kāyakammena samannāgataṁ, asucinā vacīkammena samannāgataṁ, asucinā manokammena samannāgataṁ pesalā sabrahmacārī disvā khīyadhammaṁ āpajjanti:

‘aho vata no dukkhaṁ ye mayaṁ evarūpehi puggalehi saddhiṁ saṁvasāmā’ti.

Idamassa ārodanāya vadāmi.

Seyyathāpi sā, bhikkhave, sivathikā bahuno janassa ārodanā;

tathūpamāhaṁ, bhikkhave, imaṁ puggalaṁ vadāmi.

Ime kho, bhikkhave, pañca ādīnavā sivathikūpame puggale”ti.

Navamaṁ.