Santuṭṭhitāsutta

“Tayome, bhikkhave, dhammā.

Katame tayo?

Asantuṭṭhitā, asampajaññaṁ, mahicchatā.

Ime kho, bhikkhave, tayo dhammā.

Imesaṁ kho, bhikkhave, tiṇṇaṁ dhammānaṁ pahānāya tayo dhammā bhāvetabbā.

Katame tayo?

Asantuṭṭhitāya pahānāya santuṭṭhitā bhāvetabbā, asampajaññassa pahānāya sampajaññaṁ bhāvetabbaṁ, mahicchatāya pahānāya appicchatā bhāvetabbā.

Imesaṁ kho, bhikkhave, tiṇṇaṁ dhammānaṁ pahānāya ime tayo dhammā bhāvetabbā”ti.

Aṭṭhamaṁ.