Devāsurasaṅgāmasutta
“Bhūtapubbaṁ, bhikkhave, devāsurasaṅgāmo samupabyūḷho ahosi.
Tasmiṁ kho pana, bhikkhave, saṅgāme asurā jiniṁsu, devā parājayiṁsu.
Parājitā ca, bhikkhave, devā apayiṁsuyeva uttarenābhimukhā, abhiyiṁsu asurā.
Atha kho, bhikkhave, devānaṁ etadahosi:
‘abhiyanteva kho asurā.
Yannūna mayaṁ dutiyampi asurehi saṅgāmeyyāmā’ti.
Dutiyampi kho, bhikkhave, devā asurehi saṅgāmesuṁ.
Dutiyampi kho, bhikkhave, asurāva jiniṁsu, devā parājayiṁsu.
Parājitā ca, bhikkhave, devā apayiṁsuyeva uttarenābhimukhā, abhiyiṁsu asurā.
Atha kho, bhikkhave, devānaṁ etadahosi:
‘abhiyanteva kho asurā.
Yannūna mayaṁ tatiyampi asurehi saṅgāmeyyāmā’ti.
Tatiyampi kho, bhikkhave, devā asurehi saṅgāmesuṁ.
Tatiyampi kho, bhikkhave, asurāva jiniṁsu, devā parājayiṁsu.
Parājitā ca, bhikkhave, devā bhītā devapuraṁyeva pavisiṁsu.
Devapuragatānañca pana, bhikkhave, devānaṁ etadahosi:
‘bhīruttānagatena kho dāni mayaṁ etarahi attanā viharāma akaraṇīyā asurehī’ti.
Asurānampi, bhikkhave, etadahosi:
‘bhīruttānagatena kho dāni devā etarahi attanā viharanti akaraṇīyā amhehī’ti.
Bhūtapubbaṁ, bhikkhave, devāsurasaṅgāmo samupabyūḷho ahosi.
Tasmiṁ kho pana, bhikkhave, saṅgāme devā jiniṁsu, asurā parājayiṁsu.
Parājitā ca, bhikkhave, asurā apayiṁsuyeva dakkhiṇenābhimukhā, abhiyiṁsu devā.
Atha kho, bhikkhave, asurānaṁ etadahosi:
‘abhiyanteva kho devā.
Yannūna mayaṁ dutiyampi devehi saṅgāmeyyāmā’ti.
Dutiyampi kho, bhikkhave, asurā devehi saṅgāmesuṁ.
Dutiyampi kho, bhikkhave, devā jiniṁsu, asurā parājayiṁsu.
Parājitā ca, bhikkhave, asurā apayiṁsuyeva dakkhiṇenābhimukhā, abhiyiṁsu devā.
Atha kho, bhikkhave, asurānaṁ etadahosi:
‘abhiyanteva kho devā.
Yannūna mayaṁ tatiyampi devehi saṅgāmeyyāmā’ti.
Tatiyampi kho, bhikkhave, asurā devehi saṅgāmesuṁ.
Tatiyampi kho, bhikkhave, devā jiniṁsu, asurā parājayiṁsu.
Parājitā ca, bhikkhave, asurā bhītā asurapuraṁyeva pavisiṁsu.
Asurapuragatānañca pana, bhikkhave, asurānaṁ etadahosi:
‘bhīruttānagatena kho dāni mayaṁ etarahi attanā viharāma akaraṇīyā devehī’ti.
Devānampi, bhikkhave, etadahosi:
‘bhīruttānagatena kho dāni asurā etarahi attanā viharanti akaraṇīyā amhehī’ti.
Evamevaṁ kho, bhikkhave, yasmiṁ samaye bhikkhu vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati,
tasmiṁ, bhikkhave, samaye bhikkhussa evaṁ hoti:
‘bhīruttānagatena kho dānāhaṁ etarahi attanā viharāmi akaraṇīyo mārassā’ti.
Mārassāpi, bhikkhave, pāpimato evaṁ hoti:
‘bhīruttānagatena kho dāni bhikkhu etarahi attanā viharati akaraṇīyo mayhan’ti.
Yasmiṁ, bhikkhave, samaye bhikkhu vitakkavicārānaṁ vūpasamā …pe… dutiyaṁ jhānaṁ …
tatiyaṁ jhānaṁ …
catutthaṁ jhānaṁ upasampajja viharati,
tasmiṁ, bhikkhave, samaye bhikkhussa evaṁ hoti:
‘bhīruttānagatena kho dānāhaṁ etarahi attanā viharāmi akaraṇīyo mārassā’ti.
Mārassāpi, bhikkhave, pāpimato evaṁ hoti:
‘bhīruttānagatena kho dāni bhikkhu etarahi attanā viharati, akaraṇīyo mayhan’ti.
Yasmiṁ, bhikkhave, samaye bhikkhu sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati.
Ayaṁ vuccati, bhikkhave, ‘bhikkhu antamakāsi māraṁ, apadaṁ vadhitvā māracakkhuṁ adassanaṁ gato pāpimato tiṇṇo loke visattikan’ti.
Yasmiṁ, bhikkhave, samaye bhikkhu sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharati …
sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati …
sabbaso ākiñcaññāyatanaṁ samatikkamma nevasaññānāsaññāyatanaṁ upasampajja viharati …
sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati, paññāya cassa disvā āsavā parikkhīṇā honti.
Ayaṁ vuccati, bhikkhave, ‘bhikkhu antamakāsi māraṁ, apadaṁ vadhitvā māracakkhuṁ adassanaṁ gato pāpimato tiṇṇo loke visattikan’”ti.
Aṭṭhamaṁ.
