Paṭhamavagga

Vuttañhetaṁ bhagavatā vuttamarahatāti me sutaṁ:

“Mānaṁ, bhikkhave, anabhijānaṁ aparijānaṁ tattha cittaṁ avirājayaṁ appajahaṁ abhabbo dukkhakkhayāya.

Mānañca kho, bhikkhave, abhijānaṁ parijānaṁ tattha cittaṁ virājayaṁ pajahaṁ bhabbo dukkhakkhayāyā”ti.

Etamatthaṁ bhagavā avoca.

Tatthetaṁ iti vuccati:

“Mānupetā ayaṁ pajā,

mānaganthā bhave ratā;

Mānaṁ aparijānantā,

āgantāro punabbhavaṁ.

Ye ca mānaṁ pahantvāna,

vimuttā mānasaṅkhaye;

Te mānaganthābhibhuno,

sabbadukkhamupaccagun”ti.

Ayampi attho vutto bhagavatā, iti me sutanti.

Aṭṭhamaṁ.