Brāhmaṇadhammayāgavagga

Vuttañhetaṁ bhagavatā vuttamarahatāti me sutaṁ:

“Ahamasmi, bhikkhave, brāhmaṇo yācayogo sadā payatapāṇi antimadehadharo anuttaro bhisakko sallakatto.

Tassa me tumhe puttā orasā mukhato jātā dhammajā dhammanimmitā dhammadāyādā, no āmisadāyādā.

Dvemāni, bhikkhave, dānāni—

āmisadānañca dhammadānañca.

Etadaggaṁ, bhikkhave, imesaṁ dvinnaṁ dānānaṁ yadidaṁ dhammadānaṁ.

Dveme, bhikkhave, saṁvibhāgā—

āmisasaṁvibhāgo ca dhammasaṁvibhāgo ca.

Etadaggaṁ, bhikkhave, imesaṁ dvinnaṁ saṁvibhāgānaṁ yadidaṁ dhammasaṁvibhāgo.

Dveme, bhikkhave, anuggahā—

āmisānuggaho ca dhammānuggaho ca.

Etadaggaṁ, bhikkhave, imesaṁ dvinnaṁ anuggahānaṁ yadidaṁ dhammānuggaho.

Dveme, bhikkhave, yāgā—

āmisayāgo ca dhammayāgo ca.

Etadaggaṁ, bhikkhave, imesaṁ dvinnaṁ yāgānaṁ yadidaṁ dhammayāgo”ti.

Etamatthaṁ bhagavā avoca.

Tatthetaṁ iti vuccati:

“Yo dhammayāgaṁ ayajī amaccharī,

Tathāgato sabbabhūtānukampī;

Taṁ tādisaṁ devamanussaseṭṭhaṁ,

Sattā namassanti bhavassa pāragun”ti.

Ayampi attho vutto bhagavatā, iti me sutanti.

Paṭhamaṁ.