Dutiyavagga

Vuttañhetaṁ bhagavatā vuttamarahatāti me sutaṁ:

“Tīṇimāni, bhikkhave, soceyyāni.

Katamāni tīṇi?

Kāyasoceyyaṁ, vacīsoceyyaṁ, manosoceyyaṁ—

imāni kho, bhikkhave, tīṇi soceyyānī”ti.

Etamatthaṁ bhagavā avoca.

Tatthetaṁ iti vuccati:

“Kāyasuciṁ vacīsuciṁ,

cetosucimanāsavaṁ;

Suciṁ soceyyasampannaṁ,

āhu sabbappahāyinan”ti.

Ayampi attho vutto bhagavatā, iti me sutanti.

Sattamaṁ.