Cūḷakuṇālavagga
kn / ja
Jātaka · Catukkanipāta
“Asakkhiṁ vata attānaṁ,
uddhātuṁ udakā thalaṁ;
Na dānāhaṁ puna tuyhaṁ,
vasaṁ gacchāmi vārija.
Alametehi ambehi,
jambūhi panasehi ca;
Yāni pāraṁ samuddassa,
varaṁ mayhaṁ udumbaro.
Yo ca uppatitaṁ atthaṁ,
na khippamanubujjhati;
Amittavasamanveti,
pacchā ca anutappati.
Yo ca uppatitaṁ atthaṁ,
khippameva nibodhati;
Muccate sattusambādhā,
na ca pacchānutappatī”ti.
Vānarajātakaṁ dutiyaṁ.
