Nidhikaṇḍasutta

Nidhiṁ nidheti puriso,

gambhīre odakantike;

Atthe kicce samuppanne,

atthāya me bhavissati.

Rājato vā duruttassa,

corato pīḷitassa vā;

Iṇassa vā pamokkhāya,

dubbhikkhe āpadāsu vā;

Etadatthāya lokasmiṁ,

nidhi nāma nidhīyati.

Tāvassunihito santo,

gambhīre odakantike;

Na sabbo sabbadā eva,

tassa taṁ upakappati.

Nidhi vā ṭhānā cavati,

saññā vāssa vimuyhati;

Nāgā vā apanāmenti,

yakkhā vāpi haranti naṁ.

Appiyā vāpi dāyādā,

uddharanti apassato;

Yadā puññakkhayo hoti,

sabbametaṁ vinassati.

Yassa dānena sīlena,

saṁyamena damena ca;

Nidhī sunihito hoti,

itthiyā purisassa vā.

Cetiyamhi ca saṅghe vā,

puggale atithīsu vā;

Mātari pitari cāpi,

atho jeṭṭhamhi bhātari.

Eso nidhi sunihito,

ajeyyo anugāmiko;

Pahāya gamanīyesu,

etaṁ ādāya gacchati.

Asādhāraṇamaññesaṁ,

acorāharaṇo nidhi;

Kayirātha dhīro puññāni,

yo nidhi anugāmiko.

Esa devamanussānaṁ,

sabbakāmadado nidhi;

Yaṁ yadevābhipatthenti,

sabbametena labbhati.

Suvaṇṇatā susaratā,

susaṇṭhānā surūpatā;

Ādhipaccaparivāro,

sabbametena labbhati.

Padesarajjaṁ issariyaṁ,

cakkavattisukhaṁ piyaṁ;

Devarajjampi dibbesu,

sabbametena labbhati.

Mānussikā ca sampatti,

devaloke ca yā rati;

Yā ca nibbānasampatti,

sabbametena labbhati.

Mittasampadamāgamma,

yonisova payuñjato;

Vijjāvimuttivasībhāvo,

sabbametena labbhati.

Paṭisambhidā vimokkhā ca,

yā ca sāvakapāramī;

Paccekabodhi buddhabhūmi,

sabbametena labbhati.

Evaṁ mahatthikā esā,

yadidaṁ puññasampadā;

Tasmā dhīrā pasaṁsanti,

paṇḍitā katapuññatanti.

Nidhikaṇḍasuttaṁ.