7. Pathavisandhārakapañha

Rājā āha—

“bhante nāgasena, tumhe bhaṇatha—

‘ayaṁ mahā pathavī udake patiṭṭhitā, udakaṁ vāte patiṭṭhitaṁ, vāto ākāse patiṭṭhito’ti, etampi vacanaṁ na saddahāmī”ti.

Thero dhammakarakena udakaṁ gahetvā rājānaṁ milindaṁ saññāpesi—

“yathā, mahārāja, imaṁ udakaṁ vātena ādhāritaṁ, evaṁ tampi udakaṁ vātena ādhāritan”ti.

“Kallosi, bhante nāgasenā”ti.

Pathavisandhārakapañho sattamo.