3. Buddhassaanuttarabhāvajānanapañha

Rājā āha—

“bhante nāgasena, sakkā jānituṁ ‘buddho anuttaro’”ti?

“Āma, mahārāja, sakkā jānituṁ ‘bhagavā anuttaro’”ti.

“Kathaṁ, bhante nāgasena, sakkā jānituṁ ‘buddho anuttaro’”ti?

“Bhūtapubbaṁ, mahārāja, tissatthero nāma lekhācariyo ahosi, bahūni vassāni abbhatītāni kālaṅkatassa kathaṁ so ñāyatī”ti.

“Lekhena, bhante”ti.

“Evameva kho, mahārāja, yo dhammaṁ passati, so bhagavantaṁ passati, dhammo hi, mahārāja, bhagavatā desito”ti.

“Kallosi, bhante nāgasenā”ti.

Buddhassa anuttarabhāvajānanapañho tatiyo.