7 Pulinapūjakattheraapadāna

“Vipassissa bhagavato,

bodhiyā pādaputtame;

Purāṇapulinaṁ hitvā,

suddhapulinamākiriṁ.

Ekanavutito kappe,

yaṁ pulinamadāsahaṁ;

Duggatiṁ nābhijānāmi,

pulinadānassidaṁ phalaṁ.

Tiṁsatime ito kappe,

rājā āsiṁ janādhibhū;

Mahāpulinanāmena,

cakkavattī mahabbalo.

Paṭisambhidā catasso,

vimokkhāpi ca aṭṭhime;

Chaḷabhiññā sacchikatā,

kataṁ buddhassa sāsanaṁ”.

Itthaṁ sudaṁ āyasmā pulinapūjako thero imā gāthāyo abhāsitthāti.

Pulinapūjakattherassāpadānaṁ sattamaṁ.