7 Supuṭakapūjakattheraapadāna

“Divāvihārā nikkhanto,

vipassī lokanāyako;

Bhikkhāya vicaranto so,

mama santikupāgami.

Tato patīto sumano,

buddhaseṭṭhassa tādino;

Loṇasupuṭakaṁ datvā,

kappaṁ saggamhi modahaṁ.

Ekanavutito kappe,

yaṁ puṭakamadāsahaṁ;

Duggatiṁ nābhijānāmi,

puṭakassa idaṁ phalaṁ.

Paṭisambhidā catasso,

…pe…

kataṁ buddhassa sāsanaṁ”.

Itthaṁ sudaṁ āyasmā supuṭakapūjako thero imā gāthāyo abhāsitthāti.

Supuṭakapūjakattherassāpadānaṁ sattamaṁ.