Paṭhamavagga

kn / thag
Theragāthā 7.4 · Sattakanipāta

“Disvā pāsādachāyāyaṁ,

caṅkamantaṁ naruttamaṁ;

Tattha naṁ upasaṅkamma,

vandissaṁ purisuttamaṁ.

Ekaṁsaṁ cīvaraṁ katvā,

saṁharitvāna pāṇayo;

Anucaṅkamissaṁ virajaṁ,

sabbasattānamuttamaṁ.

Tato pañhe apucchi maṁ,

pañhānaṁ kovido vidū;

Acchambhī ca abhīto ca,

byākāsiṁ satthuno ahaṁ.

Vissajjitesu pañhesu,

anumodi tathāgato;

Bhikkhusaṅghaṁ viloketvā,

imamatthaṁ abhāsatha.

‘Lābhā aṅgānaṁ magadhānaṁ,

Yesāyaṁ paribhuñjati;

Cīvaraṁ piṇḍapātañca,

Paccayaṁ sayanāsanaṁ;

Paccuṭṭhānañca sāmīciṁ,

Tesaṁ lābhāti cābravi.

Ajjatagge maṁ sopāka,

dassanāyopasaṅkama;

Esā ceva te sopāka,

bhavatu upasampadā’.

Jātiyā sattavassohaṁ,

laddhāna upasampadaṁ;

Dhāremi antimaṁ dehaṁ,

aho dhammasudhammatā”ti.

… Sopāko thero ….

← Предыдущая сутта Следующая сутта →