Candātherīgāthā

“Duggatāhaṁ pure āsiṁ,

vidhavā ca aputtikā;

Vinā mittehi ñātīhi,

bhattacoḷassa nādhigaṁ.

Pattaṁ daṇḍañca gaṇhitvā,

bhikkhamānā kulā kulaṁ;

Sītuṇhena ca ḍayhantī,

satta vassāni cārihaṁ.

Bhikkhuniṁ puna disvāna,

annapānassa lābhiniṁ;

Upasaṅkamma avocaṁ,

‘pabbajjaṁ anagāriyaṁ’.

Sā ca maṁ anukampāya,

pabbājesi paṭācārā;

Tato maṁ ovaditvāna,

paramatthe niyojayi.

Tassāhaṁ vacanaṁ sutvā,

akāsiṁ anusāsaniṁ;

Amogho ayyāyovādo,

tevijjāmhi anāsavā”ti.

… Candā therī ….

Pañcakanipāto niṭṭhito.