Najīratisutta

“Kiṁ jīrati kiṁ na jīrati,

kiṁsu uppathoti vuccati;

Kiṁsu dhammānaṁ paripantho,

kiṁsu rattindivakkhayo;

Kiṁ malaṁ brahmacariyassa,

kiṁ sinānamanodakaṁ.

Kati lokasmiṁ chiddāni,

yattha vittaṁ na tiṭṭhati;

Bhagavantaṁ puṭṭhumāgamma,

kathaṁ jānemu taṁ mayan”ti.

“Rūpaṁ jīrati maccānaṁ,

nāmagottaṁ na jīrati;

Rāgo uppathoti vuccati.

Lobho dhammānaṁ paripantho,

Vayo rattindivakkhayo;

Itthī malaṁ brahmacariyassa,

Etthāyaṁ sajjate pajā;

Tapo ca brahmacariyañca,

Taṁ sinānamanodakaṁ.

Cha lokasmiṁ chiddāni,

yattha vittaṁ na tiṭṭhati;

Ālasyañca pamādo ca,

anuṭṭhānaṁ asaṁyamo;

Niddā tandī ca te chidde,

sabbaso taṁ vivajjaye”ti.