Dutiyasukkāsutta

Ekaṁ samayaṁ bhagavā rājagahe viharati veḷuvane kalandakanivāpe.

Tena kho pana samayena aññataro upāsako sukkāya bhikkhuniyā bhojanaṁ adāsi.

Atha kho sukkāya bhikkhuniyā abhippasanno yakkho rājagahe rathikāya rathikaṁ siṅghāṭakena siṅghāṭakaṁ upasaṅkamitvā tāyaṁ velāyaṁ imaṁ gāthaṁ abhāsi:

“Puññaṁ vata pasavi bahuṁ,

Sappañño vatāyaṁ upāsako;

Yo sukkāya adāsi bhojanaṁ,

Sabbaganthehi vippamuttiyā”ti.