Assaddhasaṁsandanasutta
Sāvatthiyaṁ viharati.
“Dhātusova, bhikkhave, sattā saṁsandanti samenti.
Assaddhā assaddhehi saddhiṁ saṁsandanti samenti;
ahirikā ahirikehi saddhiṁ saṁsandanti samenti;
anottappino anottappīhi saddhiṁ saṁsandanti samenti;
appassutā appassutehi saddhiṁ saṁsandanti samenti;
kusītā kusītehi saddhiṁ saṁsandanti samenti;
muṭṭhassatino muṭṭhassatīhi saddhiṁ saṁsandanti samenti;
duppaññā duppaññehi saddhiṁ saṁsandanti samenti.
Atītampi kho, bhikkhave, addhānaṁ dhātusova sattā saṁsandiṁsu samiṁsu.
Assaddhā assaddhehi saddhiṁ saṁsandiṁsu samiṁsu;
ahirikā ahirikehi saddhiṁ saṁsandiṁsu samiṁsu;
anottappino anottappīhi saddhiṁ saṁsandiṁsu samiṁsu;
appassutā appassutehi saddhiṁ saṁsandiṁsu samiṁsu;
kusītā kusītehi saddhiṁ saṁsandiṁsu samiṁsu;
muṭṭhassatino muṭṭhassatīhi saddhiṁ saṁsandiṁsu samiṁsu;
duppaññā duppaññehi saddhiṁ saṁsandiṁsu samiṁsu.
Anāgatampi kho, bhikkhave, addhānaṁ dhātusova sattā saṁsandissanti samessanti.
Assaddhā assaddhehi saddhiṁ saṁsandissanti samessanti;
ahirikā ahirikehi saddhiṁ saṁsandissanti samessanti;
anottappino anottappīhi saddhiṁ …pe…
appassutā appassutehi saddhiṁ …pe…
kusītā kusītehi saddhiṁ …pe…
muṭṭhassatino muṭṭhassatīhi saddhiṁ …pe…
duppaññā duppaññehi saddhiṁ saṁsandissanti samessanti.
Etarahipi kho, bhikkhave, paccuppannaṁ addhānaṁ dhātusova sattā saṁsandanti samenti.
Assaddhā assaddhehi saddhiṁ saṁsandanti samenti;
ahirikā ahirikehi saddhiṁ …pe…
anottappino anottappīhi saddhiṁ …pe…
appassutā appassutehi saddhiṁ …pe…
kusītā kusītehi saddhiṁ …pe…
muṭṭhassatino muṭṭhassatīhi saddhiṁ saṁsandanti samenti;
duppaññā duppaññehi saddhiṁ saṁsandanti samenti.
Dhātusova, bhikkhave, sattā saṁsandanti samenti.
Saddhā saddhehi saddhiṁ saṁsandanti samenti;
hirimanā hirimanehi saddhiṁ saṁsandanti samenti;
ottappino ottappīhi saddhiṁ saṁsandanti samenti;
bahussutā bahussutehi saddhiṁ saṁsandanti samenti;
āraddhavīriyā āraddhavīriyehi saddhiṁ saṁsandanti samenti;
upaṭṭhitassatino upaṭṭhitassatīhi saddhiṁ saṁsandanti samenti;
paññavanto paññavantehi saddhiṁ saṁsandanti samenti.
Atītampi kho, bhikkhave, addhānaṁ …pe…
anāgatampi kho, bhikkhave …pe…
etarahipi kho, bhikkhave, paccuppannaṁ addhānaṁ dhātusova sattā saṁsandanti samenti.
Saddhā saddhehi saddhiṁ …pe…
paññavanto paññavantehi saddhiṁ saṁsandanti samentī”ti.
Sattamaṁ.
