Phassanānattasutta

Sāvatthiyaṁ viharati.

“Dhātunānattaṁ, bhikkhave, paṭicca uppajjati phassanānattaṁ.

Katamañca, bhikkhave, dhātunānattaṁ?

Cakkhudhātu sotadhātu ghānadhātu jivhādhātu kāyadhātu manodhātu—

idaṁ vuccati, bhikkhave, dhātunānattaṁ.

Kathañca, bhikkhave, dhātunānattaṁ paṭicca uppajjati phassanānattaṁ?

Cakkhudhātuṁ, bhikkhave, paṭicca uppajjati cakkhusamphasso.

Sotadhātuṁ paṭicca …

ghānadhātuṁ paṭicca …

jivhādhātuṁ paṭicca …

kāyadhātuṁ paṭicca …

manodhātuṁ paṭicca uppajjati manosamphasso.

Evaṁ kho, bhikkhave, dhātunānattaṁ paṭicca uppajjati phassanānattan”ti.

Dutiyaṁ.