Sivasutta

Evaṁ me sutaṁ—

ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.

Atha kho sivo devaputto abhikkantāya rattiyā abhikkantavaṇṇo kevalakappaṁ jetavanaṁ obhāsetvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi.

Ekamantaṁ ṭhito kho sivo devaputto bhagavato santike imā gāthāyo abhāsi:

“Sabbhireva samāsetha,

sabbhi kubbetha santhavaṁ;

Sataṁ saddhammamaññāya,

seyyo hoti na pāpiyo.

Sabbhireva samāsetha,

sabbhi kubbetha santhavaṁ;

Sataṁ saddhammamaññāya,

paññā labbhati nāññato.

Sabbhireva samāsetha,

sabbhi kubbetha santhavaṁ;

Sataṁ saddhammamaññāya,

sokamajjhe na socati.

Sabbhireva samāsetha,

sabbhi kubbetha santhavaṁ;

Sataṁ saddhammamaññāya,

ñātimajjhe virocati.

Sabbhireva samāsetha,

sabbhi kubbetha santhavaṁ;

Sataṁ saddhammamaññāya,

sattā gacchanti suggatiṁ.

Sabbhireva samāsetha,

sabbhi kubbetha santhavaṁ;

Sataṁ saddhammamaññāya,

sattā tiṭṭhanti sātatan”ti.

Atha kho bhagavā sivaṁ devaputtaṁ gāthāya paccabhāsi:

“Sabbhireva samāsetha,

sabbhi kubbetha santhavaṁ;

Sataṁ saddhammamaññāya,

sabbadukkhā pamuccatī”ti.