Paṇītatarasutta

Sāvatthinidānaṁ.

“Catasso imā, bhikkhave, nāgayoniyo.

Katamā catasso?

Aṇḍajā nāgā, jalābujā nāgā, saṁsedajā nāgā, opapātikā nāgā.

Tatra, bhikkhave, aṇḍajehi nāgehi jalābujā ca saṁsedajā ca opapātikā ca nāgā paṇītatarā.

Tatra, bhikkhave, aṇḍajehi ca jalābujehi ca nāgehi saṁsedajā ca opapātikā ca nāgā paṇītatarā.

Tatra, bhikkhave, aṇḍajehi ca jalābujehi ca saṁsedajehi ca nāgehi opapātikā nāgā paṇītatarā.

Imā kho, bhikkhave, catasso nāgayoniyo”ti.

Dutiyaṁ.