Doṇapākasutta

Sāvatthinidānaṁ.

Tena kho pana samayena rājā pasenadi kosalo doṇapākakuraṁ bhuñjati.

Atha kho rājā pasenadi kosalo bhuttāvī mahassāsī yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.

Atha kho bhagavā rājānaṁ pasenadiṁ kosalaṁ bhuttāviṁ mahassāsiṁ viditvā tāyaṁ velāyaṁ imaṁ gāthaṁ abhāsi:

“Manujassa sadā satīmato,

Mattaṁ jānato laddhabhojane;

Tanukassa bhavanti vedanā,

Saṇikaṁ jīrati āyupālayan”ti.

Tena kho pana samayena sudassano māṇavo rañño pasenadissa kosalassa piṭṭhito ṭhito hoti.

Atha kho rājā pasenadi kosalo sudassanaṁ māṇavaṁ āmantesi:

“ehi tvaṁ, tāta sudassana, bhagavato santike imaṁ gāthaṁ pariyāpuṇitvā mama bhattābhihāre bhattābhihāre bhāsa.

Ahañca te devasikaṁ kahāpaṇasataṁ kahāpaṇasataṁ niccaṁ bhikkhaṁ pavattayissāmī”ti.

“Evaṁ, devā”ti kho sudassano māṇavo rañño pasenadissa kosalassa paṭissutvā bhagavato santike imaṁ gāthaṁ pariyāpuṇitvā rañño pasenadissa kosalassa bhattābhihāre sudaṁ bhāsati:

“Manujassa sadā satīmato,

Mattaṁ jānato laddhabhojane;

Tanukassa bhavanti vedanā,

Saṇikaṁ jīrati āyupālayan”ti.

Atha kho rājā pasenadi kosalo anupubbena nāḷikodanaparamatāya saṇṭhāsi.

Atha kho rājā pasenadi kosalo aparena samayena susallikhitagatto pāṇinā gattāni anumajjanto tāyaṁ velāyaṁ imaṁ udānaṁ udānesi:

“ubhayena vata maṁ so bhagavā atthena anukampi—

diṭṭhadhammikena ceva atthena samparāyikena cā”ti.