Vātavalāhakasutta

Sāvatthinidānaṁ.

Ekamantaṁ nisinno kho so bhikkhu bhagavantaṁ etadavoca:

“ko nu kho, bhante, hetu, ko paccayo, yenekadā vāto hotī”ti?

“Santi, bhikkhu, vātavalāhakā nāma devā.

Tesaṁ yadā evaṁ hoti:

‘yannūna mayaṁ sakāya ratiyā vaseyyāmā’ti, tesaṁ taṁ cetopaṇidhimanvāya vāto hoti.

Ayaṁ kho, bhikkhu, hetu, ayaṁ paccayo, yenekadā vāto hotī”ti.

Chappaññāsamaṁ.